ޗައިނާގެ ސިވިލް ސާރިވިސްއިން 31000 އަށް ވުރެ ގިނަ ވަޒީފާގެ ފުރުސަތު ހުޅުވާލުމަށް ނިންމައިފިއެވެ.
2022 ވަނަ އަހަރަށް ހުޅުވާލާ މި ވަޒީފާތަކަކީ އެގައުމުގެ 75 އިދާރާއަކާއި، އެ އިދާރަތަކާ ގުޅޭ 23 އިތުރު އިދާރާއަކަށް މުވައްޒަފުން ހޯދުމުގެ ގޮތުން ހުޅުވާލާފައިވާ ފުރުސަތެއް ކަމަށް އެގައުމުގެ ސިވިލް ސާރވިސް އެޑްމިނިސްޓްރޭޝަނުން މައުލޫމާތުދެއެވެ.
ޗައިނާގެ ސިވިލް ސާރވިސް އެޑްމިނިސްޓްރޭޝަނުން މައުލޫމާތުދޭގޮތުގައި މި ވަޒީފާތަކާއި ބެހޭ އެންމެހާ މައުލޫމާތެއް އެ އިދާރާގެ ވެބްސައިޓު މެދުވެރިކޮށް އާންމުކުރެވޭނެއެވެ. ހަމަ އެހެންމެ ކުރިމަތިލާ ފަރާތްތަކުން ޚާއްސަ އިމްތިހާނެއް ފުރިހަމަ ކުރަންޖެހޭނެ ކަމަށް އެ އިދާރާއިން މައުލޫމާތުދެއެވެ. މި އިމްތިހާނު ބޭއްވުމަށް ހަމަޖެހިފައިވަނީ ނޮވެންބަރު މަހުގެ 28 ވަނަ ދުވަހުއެވެ.
ޗައިނާގެ ސިވިލް ސާރވިސް އެޑްމިނިސްޓްރޭޝަނުން މިއަހަރު މި ހުޅުވާލި ވަޒީފާގެ ފުރުސަތު ތަކަކީ މިދިޔަ އަހަރާ ބަލާއިރު 18% އިތުރު އަދަދެކެވެ. މިދިޔަ އަހަރު ފަހުކޮޅު އެ އިދާރާއިން ހުޅުވާލި ވަޒީފާގެ ފުރުސަތުގެ ޖުމްލަ އަދަދަކީ 25700 ވަޒީފާއެވެ. މިފަހަރުގެ ވަޒީފާތަކުގެ ތެރެއިން 21000 ވަޒިފާ ޚާއްސަކުރެވިފައިވަނީ މިއަހަރު އެގައުމުގެ ޔުނިވަރސިޓީތަކުން މަތީ ތައުލީމު ހާސިލްކޮށް ނިންމާ ދަރިވަރުންނަށެވެ.
